yahan jo kuchh hai husn-e-la-makan ke ma-siwa kya hai

yahāñ jo kuchh hai husn-e-lā-makāñ ke mā-sivā kyā hai

magar jalva hī jalva hai to merā aa.ina kyā hai

tū hī shah-e-rag meñ rahtā hai to hī mauj-e-nafas meñ hai

to phir batlā ki mā-o-tū meñ itnā fāsla kyā hai

mashām-e-jāñ meñ kaisī ḳhushbuoñ kī aaj bārish hai

chhupā.e apne dāman meñ ḳhudā jaane sabā kyā hai

ham aise saḳht-jānoñ kā bahut mushkil hai mar jaanā

sivā-e-zindagī ke aur koī rāsta kyā hai

na jaane jañgaloñ meñ apne kaisī aag ugtī hai

ujāloñ kā sar-e-kohsār jagmag silsila kyā hai

yahī hairat hai kaise daur maiñ jiinā paḌā mujh ko

samajh meñ kuchh nahīñ aatā bhalā kyā hai burā kyā hai

'shamīm' achchhā kiyā ki aap ne sab kuchh bhulā Daalā

magar rah rah ke dil meñ gūñjtī pichhlī sadā kyā hai

yahan jo kuchh hai husn-e-la-makan ke ma-siwa kya hai

magar jalwa hi jalwa hai to mera aaina kya hai

tu hi shah-e-rag mein rahta hai to hi mauj-e-nafas mein hai

to phir batla ki ma-o-tu mein itna fasla kya hai

masham-e-jaan mein kaisi KHushbuon ki aaj barish hai

chhupae apne daman mein KHuda jaane saba kya hai

hum aise saKHt-jaanon ka bahut mushkil hai mar jaana

siwa-e-zindagi ke aur koi rasta kya hai

na jaane jangalon mein apne kaisi aag ugti hai

ujalon ka sar-e-kohsar jagmag silsila kya hai

yahi hairat hai kaise daur main jina paDa mujh ko

samajh mein kuchh nahin aata bhala kya hai bura kya hai

'shamim' achchha kiya ki aap ne sab kuchh bhula Dala

magar rah rah ke dil mein gunjti pichhli sada kya hai