yahan jo peD the apni jaDon ko chhoD chuke

yahāñ jo peḌ the apnī jaḌoñ ko chhoḌ chuke

qadam jamātī huī sab rutoñ ko chhoḌ chuke

koī tasavvur-e-zindāñ bhī ab nahīñ baaqī

ham us zamāne ke sab dostoñ ko chhoḌ chuke

bhaTak rahe haiñ ab uḌte hue ġhubār ke saath

musāfir apne sabhī rāstoñ ko chhoḌ chuke

nikal chuke haiñ tire roz o shab se ab aage

dinoñ ko chhoḌ chuke ham shaboñ ko chhoḌ chuke

na jaane kis liye hijrat pe vo hue majbūr

parinde apne sabhī ghoñsloñ ko chhoḌ chuke

jo mar ga.e unheñ zindān se nikāleñge

nahīñ ki ahl-e-qafas qaidiyoñ ko chhoḌ chuke

agarche aisā nahīñ lag rahā hai aisā magar

ki raahī saare 'zafar' rahbaroñ ko chhoḌ chuke

yahan jo peD the apni jaDon ko chhoD chuke

qadam jamati hui sab ruton ko chhoD chuke

koi tasawwur-e-zindan bhi ab nahin baqi

hum us zamane ke sab doston ko chhoD chuke

bhaTak rahe hain ab uDte hue ghubar ke sath

musafir apne sabhi raston ko chhoD chuke

nikal chuke hain tere roz o shab se ab aage

dinon ko chhoD chuke hum shabon ko chhoD chuke

na jaane kis liye hijrat pe wo hue majbur

parinde apne sabhi ghonslon ko chhoD chuke

jo mar gae unhen zindan se nikalenge

nahin ki ahl-e-qafas qaidiyon ko chhoD chuke

agarche aisa nahin lag raha hai aisa magar

ki rahi sare 'zafar' rahbaron ko chhoD chuke