yahan par mera kuchh bhi tha hi nahin

yahāñ par mirā kuchh bhī thā hī nahīñ

so ghāTā zarā bhī huā hī nahīñ

ragoñ tak meñ ḳhushbū tirī jazb kī

havā pe bharosa kiyā hī nahīñ

mire dil kī hālat jo thī vo rahī

ye paudā shajar to huā hī nahīñ

vo kyā mājrā thā khulā hī nahīñ

nishāne pe patthar lagā hī nahīñ

kahānī diye kī bahut ḳhuub hai

magar is meñ zikr-e-havā hī nahīñ

javāboñ ke chehroñ pe haiñ uljhaneñ

savāloñ kā ab tak pata hī nahīñ

safar kā maiñ āġhāz kaise karūñ

mire haq meñ koī duā hī nahīñ

yahan par mera kuchh bhi tha hi nahin

so ghaTa zara bhi hua hi nahin

ragon tak mein KHushbu teri jazb ki

hawa pe bharosa kiya hi nahin

mere dil ki haalat jo thi wo rahi

ye pauda shajar to hua hi nahin

wo kya majra tha khula hi nahin

nishane pe patthar laga hi nahin

kahani diye ki bahut KHub hai

magar is mein zikr-e-hawa hi nahin

jawabon ke chehron pe hain uljhanen

sawalon ka ab tak pata hi nahin

safar ka main aaghaz kaise karun

mere haq mein koi dua hi nahin