yahan sab se alag sab se juda hona tha mujhko

yahāñ sab se alag sab se judā honā thā mujh ko

magar kyā ho gayā huuñ aur kyā honā thā mujh ko

abhī ik lahar thī jis ko guzarnā thā saroñ se

abhī ik lafz thā meñ aur adā honā thā mujh ko

phir us ko DhūñDne meñ umr saarī biit jaatī

koī apnī hī gum-gashta sadā honā thā mujh ko

pasand aayā kisī ko merā āñdhī ban ke uThnā

kisī kī raa.e meñ bād-e-sabā honā thā mujh ko

vahāñ se bhī guzar aayā huuñ ḳhāmoshī meñ ab ke

jahāñ ik shor kī sūrat bapā honā thā mujh ko

dar-o-dīvār se itnī mohabbat kis ke liye thī

agar is qaid ḳhāne se rihā honā thā mujh ko

maiñ apnī raakh se be-shak dobāra sar uThātā

magar ik baar to jal kar fanā honā thā mujh ko

maiñ andar se kahīñ tabdīl honā chāhtā thā

purānī keñchulī meñ hī nayā honā thā mujh ko

'zafar' maiñ ho gayā kuchh aur varna asl meñ to

burā honā thā mujh ko yā bhalā honā thā mujh ko

yahan sab se alag sab se juda hona tha mujh ko

magar kya ho gaya hun aur kya hona tha mujh ko

abhi ek lahar thi jis ko guzarna tha saron se

abhi ek lafz tha mein aur ada hona tha mujh ko

phir us ko DhunDne mein umr sari bit jati

koi apni hi gum-gashta sada hona tha mujh ko

pasand aaya kisi ko mera aandhi ban ke uThna

kisi ki rae mein baad-e-saba hona tha mujh ko

wahan se bhi guzar aaya hun KHamoshi mein ab ke

jahan ek shor ki surat bapa hona tha mujh ko

dar-o-diwar se itni mohabbat kis ke liye thi

agar is qaid KHane se riha hona tha mujh ko

main apni rakh se be-shak dobara sar uThata

magar ek bar to jal kar fana hona tha mujh ko

main andar se kahin tabdil hona chahta tha

purani kenchuli mein hi naya hona tha mujh ko

'zafar' main ho gaya kuchh aur warna asl mein to

bura hona tha mujh ko ya bhala hona tha mujh ko