yahan se ab kahin le chal KHayal-e-yar mujhe

yahāñ se ab kahīñ le chal ḳhayāl-e-yār mujhe

chaman meñ raas na aa.egī ye bahār mujhe

tirī latīf nigāhoñ kī ḳhaas jumbish ne

banā diyā tirī fitrat kā rāzdār mujhe

mirī hayāt kā anjām aur kuchh hotā

jo aap kahte kabhī apnā jāñ-nisār mujhe

badal diyā hai nigāhoñ se ruḳh zamāne kā

kabhī rahā hai zamāne pe iḳhtiyār mujhe

maiñ jab chalā huuñ ba-īñ zauq-e-bandagī ai dost

qadam qadam pe mile āstāñ hazār mujhe

ye hādsāt jo haiñ iztirāb kā paiġhām

ye hādsāt hī ā.eñge sāzgār mujhe

'azīz' ahl-e-chaman kī shikāyateñ be-sūd

fareb de ga.ī rañgīnī-e-bahār mujhe

yahan se ab kahin le chal KHayal-e-yar mujhe

chaman mein ras na aaegi ye bahaar mujhe

teri latif nigahon ki KHas jumbish ne

bana diya teri fitrat ka raazdar mujhe

meri hayat ka anjam aur kuchh hota

jo aap kahte kabhi apna jaan-nisar mujhe

badal diya hai nigahon se ruKH zamane ka

kabhi raha hai zamane pe iKHtiyar mujhe

main jab chala hun ba-in zauq-e-bandagi ai dost

qadam qadam pe mile aastan hazar mujhe

ye hadsat jo hain iztirab ka paigham

ye hadsat hi aaenge sazgar mujhe

'aziz' ahl-e-chaman ki shikayaten be-sud

fareb de gai rangini-e-bahaar mujhe