yahi arman yahi shauq hai diwane ka

yahī armān yahī shauq hai dīvāne kā

rang phīkā na paḌe ishq ke afsāne kā

bāda-ḳhvāroñ ko tire hosh abhī baaqī hai

daur chaltā rahe saaqī yūñhī paimāne kā

bahr-e-ulfat se huā paar safīna merā

qasd jab kar liyā tūfān se Takrāne kā

bijliyāñ ġham kī girīñ ḳhirman-e-dil par mere

silsila ḳhatm huā aap se yārāne kā

manzar-e-bāda-kashī yuuñ to bahut dekhā hai

rang kuchh aur hai saaqī tire maiḳhāne kā

merī ulfat kā yaqīn un ko na aa.e lekin

shikva hargiz na karūñgā kabhī jhuTlāne kā

ek sajde meñ mohabbat ke jabīñ par apnī

khīñch laayā huuñ maiñ naqsha tire kāshāne kā

us ke raste meñ raqīboñ ne bichhā.e kāñTe

va.ada us but ne kiyā jab bhī kabhī aane kā

qais-o-farhād ke qisse bhī sune haiñ lekin

Dhang kuchh aur hai 'ahmar' tere afsāne kā

yahi arman yahi shauq hai diwane ka

rang phika na paDe ishq ke afsane ka

baada-KHwaron ko tere hosh abhi baqi hai

daur chalta rahe saqi yunhi paimane ka

bahr-e-ulfat se hua par safina mera

qasd jab kar liya tufan se Takrane ka

bijliyan gham ki girin KHirman-e-dil par mere

silsila KHatm hua aap se yarane ka

manzar-e-baada-kashi yun to bahut dekha hai

rang kuchh aur hai saqi tere maiKHane ka

meri ulfat ka yaqin un ko na aae lekin

shikwa hargiz na karunga kabhi jhuTlane ka

ek sajde mein mohabbat ke jabin par apni

khinch laya hun main naqsha tere kashane ka

us ke raste mein raqibon ne bichhae kanTe

wada us but ne kiya jab bhi kabhi aane ka

qais-o-farhad ke qisse bhi sune hain lekin

Dhang kuchh aur hai 'ahmar' tere afsane ka