yahi gar husn ka aalam rahega

yahī gar husn kā aalam rahegā

to zaḳhm-e-ishq be-marham rahegā

na de ai nāseh-e-mushfiq tasallī

ki jab tak ham raheñge ġham rahegā

hai jis ke dam se ye hangāma-e-ishq

vahī har dam rahā har dam rahegā

bashar yaañ sej par phūloñ kī kab tak

misāl-e-qatra-e-shabnam rahegā

ġham-e-dil dene vaale sach batānā

tujhe bhī kuchh hamārā ġham rahegā

nihāl-e-ishq ko shādāb kar luuñ

phir in āñkhoñ meñ kab tak nam rahegā

tumhārī yaad har dam taaza hogī

hamāre dam meñ jab tak dam rahegā

dayār-e-yār kā milnā hai mushkil

jo ye rāhoñ kā pech-o-ḳham rahegā

nishāñ baaqī na hogā bazm-e-jam kā

magar gardish meñ jām-e-jam rahegā

yahī parvāz hai us kī to kab tak

banī-ādam banī-ādam rahegā

ye hindī se farañgī kah rahā thā

ki jab tak tum rahoge ham rahegā

dam-e-ruḳhsat vo kahte the ki 'nāzir'

tire jaane kā ham ko ġham rahegā

yahi gar husn ka aalam rahega

to zaKHm-e-ishq be-marham rahega

na de ai naseh-e-mushfiq tasalli

ki jab tak hum rahenge gham rahega

hai jis ke dam se ye hangama-e-ishq

wahi har dam raha har dam rahega

bashar yan sej par phulon ki kab tak

misal-e-qatra-e-shabnam rahega

gham-e-dil dene wale sach batana

tujhe bhi kuchh hamara gham rahega

nihaal-e-ishq ko shadab kar lun

phir in aankhon mein kab tak nam rahega

tumhaari yaad har dam taza hogi

hamare dam mein jab tak dam rahega

dayar-e-yar ka milna hai mushkil

jo ye rahon ka pech-o-KHam rahega

nishan baqi na hoga bazm-e-jam ka

magar gardish mein jam-e-jam rahega

yahi parwaz hai us ki to kab tak

bani-adam bani-adam rahega

ye hindi se farangi kah raha tha

ki jab tak tum rahoge hum rahega

dam-e-ruKHsat wo kahte the ki 'nazir'

tere jaane ka hum ko gham rahega