yahi guman ghumta hai KHema-e-KHayal mein

yahī gumān ghūmtā hai ḳhema-e-ḳhayāl meñ

nigāh ġharq ho ga.ī hai kis ke ḳhadd-o-ḳhāl meñ

maiñ haal apnā dosto tumheñ sunā.ūñ kis tarah

taḌap taḌap ke jī rahā huuñ siskiyoñ ke jaal meñ

ki raat kī sī tīrgī hai sub.h kī numūd meñ

ki hijr kī sī lazzateñ haiñ ab tire visāl meñ

na-jāne kis ke haath se milā hai ham ko surḳh phuul

na-jāne kis kā haath hai hamāre intiqāl meñ

unheñ kabhī ḳhayāl tak nahīñ huā visāl kā

hamārī 'umr kaT ga.ī visāl ke ḳhayāl meñ

udāsiyāñ isī liye bhī ḳhuun meñ bahut haiñ aaj

tirā malāl aa girā hai mere dil ke thaal meñ

tū DhūñDhtā hai kis liye javāb is kā dar-ba-dar

tirā javāb to nihāñ hai tere hī savāl meñ

yahi guman ghumta hai KHema-e-KHayal mein

nigah gharq ho gai hai kis ke KHadd-o-KHal mein

main haal apna dosto tumhein sunaun kis tarah

taDap taDap ke ji raha hun siskiyon ke jal mein

ki raat ki si tirgi hai subh ki numud mein

ki hijr ki si lazzaten hain ab tere visal mein

na-jaane kis ke hath se mila hai hum ko surKH phul

na-jaane kis ka hath hai hamare intiqal mein

unhen kabhi KHayal tak nahin hua visal ka

hamari 'umr kaT gai visal ke KHayal mein

udasiyan isi liye bhi KHun mein bahut hain aaj

tera malal aa gira hai mere dil ke thaal mein

tu DhunDhta hai kis liye jawab is ka dar-ba-dar

tera jawab to nihan hai tere hi sawal mein