yahi hain barq ki jaulaniyan to aashiyan kab tak

yahī haiñ barq kī jaulāniyāñ to āshiyāñ kab tak

uThegā ḳhāk-e-parvāna se mahfil meñ dhuāñ kab tak

ġham-e-sayyād ḳhauf-e-barq fikr-e-āshiyāñ kab tak

uThā.egī ye sadme ek jān-e-nā-tavāñ kab tak

yahī hai dard-e-roz-afzūñ yahī betābi-e-paiham

to ye rāz-e-mohabbat raaz kab tak rāz-dāñ kab tak

tirī nazroñ ko bhī jhuknā paḌegā ḳhud-baḳhud ik din

mire dukhte hue dil kī duā.eñ rā.egāñ kab tak

ziyā-e-husn har zarre ko ik din jagmagā degī

tire jalvoñ ko rokeñge hudūd-e-lā-makāñ kab tak

ḳhabar bhī hai tujhe betābī-e-dil baḌhtī jaatī hai

ḳhudā jaane rahegī mere qaabū meñ zabāñ kab tak

zarā apne taġhāful kī nihāyat bhī batā diije

rahegā mūrid-e-ilzām majbūr-e-fuġhāñ kab tak

ye mahrūmī na jaane kis ke qadmoñ par girā degī

nigāh-e-shauq DhūñDegī kisī kā āstāñ kab tak

vo jalve phir vo jalve haiñ vo nazreñ phir vo nazreñ haiñ

dil-e-nādāñ yaqīn-e-hastī-e-tāb-o-tavāñ kab tak

bisāt-e-dil hai kyā naqsha badal jā.egā duniyā kā

ye āñkheñ haiñ ye nazreñ haiñ to tanzīm-e-jahāñ kab tak

mohabbat ḳhud-baḳhud ik din har ik parda uThā degī

'munīr' is dil se vo bad-zan dil un se bad-gumāñ kab tak

yahi hain barq ki jaulaniyan to aashiyan kab tak

uThega KHak-e-parwana se mahfil mein dhuan kab tak

gham-e-sayyaad KHauf-e-barq fikr-e-ashiyan kab tak

uThaegi ye sadme ek jaan-e-na-tawan kab tak

yahi hai dard-e-roz-afzun yahi betabi-e-paiham

to ye raaz-e-mohabbat raaz kab tak raaz-dan kab tak

teri nazron ko bhi jhukna paDega KHud-baKHud ek din

mere dukhte hue dil ki duaen raegan kab tak

ziya-e-husn har zarre ko ek din jagmaga degi

tere jalwon ko rokenge hudud-e-la-makan kab tak

KHabar bhi hai tujhe betabi-e-dil baDhti jati hai

KHuda jaane rahegi mere qabu mein zaban kab tak

zara apne taghaful ki nihayat bhi bata dije

rahega murid-e-ilzam majbur-e-fughan kab tak

ye mahrumi na jaane kis ke qadmon par gira degi

nigah-e-shauq DhunDegi kisi ka aastan kab tak

wo jalwe phir wo jalwe hain wo nazren phir wo nazren hain

dil-e-nadan yaqin-e-hasti-e-tab-o-tawan kab tak

bisat-e-dil hai kya naqsha badal jaega duniya ka

ye aankhen hain ye nazren hain to tanzim-e-jahan kab tak

mohabbat KHud-baKHud ek din har ek parda uTha degi

'munir' is dil se wo bad-zan dil un se bad-guman kab tak