yahi hisab-e-mohabbat dobara kar ke lao

yahī hisāb-e-mohabbat dobāra kar ke laao

jahāñ jahāñ hai munāfe.a ḳhasāra kar ke laao

barāh-e-rāst na chhūnā kabhī vo sho.ala-e-tūr

zarā zarā sā use isti.āra kar ke laao

badan se phuuT paḌā us kī ruuh kā sailāb

to jaao us ko badan kā kināra kar ke laao

na.e visāl kī ḳhātir guzāro iddat-e-hijr

aur apne dil ko dobāra kañvārā kar ke laao

dayār-e-ishq meñ aur itne karr-o-far ke saath

badan ko toḌ ke dil ko bechāra kar ke laao

baḌā yaqīñ hai mohabbat ke mo.ajizoñ pe tumheñ

to lo ye qatra-e-ashk aur sitāra kar ke laao

yahi hisab-e-mohabbat dobara kar ke lao

jahan jahan hai munafea KHasara kar ke lao

barah-e-rast na chhuna kabhi wo shoala-e-tur

zara zara sa use istiara kar ke lao

badan se phuT paDa us ki ruh ka sailab

to jao us ko badan ka kinara kar ke lao

nae visal ki KHatir guzaro iddat-e-hijr

aur apne dil ko dobara kanwara kar ke lao

dayar-e-ishq mein aur itne karr-o-far ke sath

badan ko toD ke dil ko bechaara kar ke lao

baDa yaqin hai mohabbat ke moajizon pe tumhein

to lo ye qatra-e-ashk aur sitara kar ke lao