yahi jo aaj hain Khaaron pe chalne wale log

yahī jo aaj haiñ ḳhāroñ pe chalne vaale log

kabhī the chāñd sitāroñ pe chalne vaale log

inheñ shu.ūr nahīñ kis taraf ko jaate haiñ

ye sab haiñ josh meñ na.aroñ pe chalne vaale log

sulagtī ret ho neza ho āg-o-dariyā ho

haiñ merī qaum meñ chāroñ pe chalne vaale log

zabān kaise samajh pā.eñge azīmat kī

ye maslahat ke ishāroñ pe chalne vaale log

junūn-e-ishq ke māroñ kī hai yahī tamsīl

hoñ jaise bijlī ke tāroñ pe chalne vaale log

bhaTak rahā hai añdhere meñ haq ki mil jaa.eñ

chamaktī teġh kī dhāroñ pe chalne vaale log

'nabīl' pyaar kī ik jhiil thā magar afsos

samajh sake na kināroñ pe chalne vaale log

yahi jo aaj hain KHaron pe chalne wale log

kabhi the chand sitaron pe chalne wale log

inhen shuur nahin kis taraf ko jate hain

ye sab hain josh mein naron pe chalne wale log

sulagti ret ho neza ho aag-o-dariya ho

hain meri qaum mein chaaron pe chalne wale log

zaban kaise samajh paenge azimat ki

ye maslahat ke ishaaron pe chalne wale log

junun-e-ishq ke maron ki hai yahi tamsil

hon jaise bijli ke taron pe chalne wale log

bhaTak raha hai andhere mein haq ki mil jaen

chamakti tegh ki dhaaron pe chalne wale log

'nabil' pyar ki ek jhil tha magar afsos

samajh sake na kinaron pe chalne wale log