yahi kaha tha ki KHasta-zaban mein baat na kar

yahī kahā thā ki ḳhasta-zabāñ meñ baat na kar

ab itnī baat pe tark-e-ta'alluqāt na kar

tumheñ sikhā diyā thā ham ne dil-lagī kā hunar

ḳhudā kā naam le ab yuuñ hamāre saath na kar

mujhe ḳhabar hai ki ehsāñ asiir kartā hai

tū aisā kar ki mujhe bār-e-iltifāt na kar

usī ke duudh se tū ne javānī paa.ī hai

muhāfizā usī bastī meñ vārdāt na kar

hamārī billī hameñ myā.un myā.un kartī hai kyā

hudūd-e-zāt meñ rah yuuñ tajāvuzāt na kar

ġharīb-e-shām kī tarkīb musta'ār le le

palīd zikr se guftār-e-vāhiyāt na kar

maiñ jāntā huuñ kināra-kashī ko aayā hai

tū apnā hukm sunā yuuñ guzārishāt na kar

abhī piyāda sar-e-shāh kā muhāfiz hai

abhī bisāt palaT dūñgā shah ko maat na kar

kisī 'azīz ko hai intizār ai 'zamzam'

javān zindagī hai nazr-e-hādsāt na kar

yahi kaha tha ki KHasta-zaban mein baat na kar

ab itni baat pe tark-e-ta'alluqat na kar

tumhein sikha diya tha hum ne dil-lagi ka hunar

KHuda ka nam le ab yun hamare sath na kar

mujhe KHabar hai ki ehsan asir karta hai

tu aisa kar ki mujhe bar-e-iltifat na kar

usi ke dudh se tu ne jawani pai hai

muhafiza usi basti mein wardat na kar

hamari billi hamein myaun myaun karti hai kya

hudud-e-zat mein rah yun tajawuzat na kar

gharib-e-sham ki tarkib musta'ar le le

palid zikr se guftar-e-wahiyat na kar

main jaanta hun kinara-kashi ko aaya hai

tu apna hukm suna yun guzarishat na kar

abhi piyaada sar-e-shah ka muhafiz hai

abhi bisat palaT dunga shah ko mat na kar

kisi 'aziz ko hai intizar ai 'zamzam'

jawan zindagi hai nazr-e-hadsat na kar