yahi muamma mere pesh-o-pas paDa hua hai

yahī muamma mire pesh-o-pas paḌā huā hai

mirā badan hai ki miTTī meñ ḳhas paḌā huā hai

maiñ ek naqsh banātā huuñ ik nigaltā huuñ

mirā hunar pas-e-hirs-o-havas paḌā huā hai

koī bhī peḌ jo dekhūñ to aisā lagtā hai

parindagī ke liye ik qafas paḌā huā hai

ḳhudā-e-arz use ab to shakl de koī

mirā vajūd tah-e-ḳhāk-o-ḳhas paḌā huā hai

jo ho sake to inheñ bhī uThā ke le jaanā

hamārī mez pe ek ik baras paḌā huā hai

havā kī sāzisheñ apnī jagah magar 'fāḳhir'

shajar kī shāḳhoñ meñ ab ke bhī ras paḌā huā hai

yahi muamma mere pesh-o-pas paDa hua hai

mera badan hai ki miTTi mein KHas paDa hua hai

main ek naqsh banata hun ek nigalta hun

mera hunar pas-e-hirs-o-hawas paDa hua hai

koi bhi peD jo dekhun to aisa lagta hai

parindagi ke liye ek qafas paDa hua hai

KHuda-e-arz use ab to shakl de koi

mera wajud tah-e-KHak-o-KHas paDa hua hai

jo ho sake to inhen bhi uTha ke le jaana

hamari mez pe ek ek baras paDa hua hai

hawa ki sazishen apni jagah magar 'faKHir'

shajar ki shaKHon mein ab ke bhi ras paDa hua hai