yahi mushkil hai wo mushkil ko aasani samajhta hai

yahī mushkil hai vo mushkil ko āsānī samajhtā hai

hamāre ḳhuun ko bhī ḳhuun kab paanī samajhtā hai

mohabbat meñ ye pāgal-pan mirī to ik nahīñ suntā

tirī nārāzgī ko ḳhanda-peshānī samajhtā hai

kisī ko bhī samajh aatā nahīñ bāhar kī duniyā meñ

magar ye dil to andar kī bayābānī samajhtā hai

lagā kar jaan se rakhtā hai jān-o-māl tū apnā

hameñ qurbān karne ko hī qurbānī samajhtā hai

samundar kī ġhalat-fahmī kā andāza nahīñ tujh ko

vo bādal ko mirī āñkhoñ kī tuġhyānī samajhtā hai

kahīñ achchhā hai sannāToñ se pahroñ guftugū karnā

vo is bāzār kī raunaq ko vīrānī samajhtā hai

yahī darvesh kī kuTiyā hai qasr-e-qaisar-o-kisrā

vo apne jhoñpaḌe ko qasr-e-sultānī samajhtā hai

hamārā ishq pahle din se sarpaT bhāgtā ghoḌā

vo in sañglāḳh rastoñ ko bhī maidānī samajhtā hai

añdherā raat bhar masrūf pech-o-tāb khāne meñ

diye kī phaḌphaḌāhaT ko bhī man-mānī samajhtā hai

sarāsar ranj hai saare kā saarā is ta'alluq meñ

sitam to ye hai is ko bhī meherbānī samajhtā hai

yahi mushkil hai wo mushkil ko aasani samajhta hai

hamare KHun ko bhi KHun kab pani samajhta hai

mohabbat mein ye pagal-pan meri to ek nahin sunta

teri naraazgi ko KHanda-peshani samajhta hai

kisi ko bhi samajh aata nahin bahar ki duniya mein

magar ye dil to andar ki bayabani samajhta hai

laga kar jaan se rakhta hai jaan-o-mal tu apna

hamein qurban karne ko hi qurbani samajhta hai

samundar ki ghalat-fahmi ka andaza nahin tujh ko

wo baadal ko meri aankhon ki tughyani samajhta hai

kahin achchha hai sannaTon se pahron guftugu karna

wo is bazar ki raunaq ko virani samajhta hai

yahi darwesh ki kuTiya hai qasr-e-qaisar-o-kisra

wo apne jhonpaDe ko qasr-e-sultani samajhta hai

hamara ishq pahle din se sarpaT bhagta ghoDa

wo in sanglaKH raston ko bhi maidani samajhta hai

andhera raat bhar masruf pech-o-tab khane mein

diye ki phaDphaDahaT ko bhi man-mani samajhta hai

sarasar ranj hai sare ka sara is ta'alluq mein

sitam to ye hai is ko bhi meherbani samajhta hai