yahi nahin hai ki shanon se KHun bahta hai

yahī nahīñ hai ki shānoñ se ḳhuun bahtā hai

abhī to apnī miyānoñ se ḳhuun bahtā hai

vo gaal surḳh hue hoñ to yuuñ lageñ jaise

safed reshmī thānoñ se ḳhuun bahtā hai

ye ḳhāmushī vo balā hai ki chīḳh uTThe agar

to sunñe vāloñ ke kānoñ se ḳhuun bahtā hai

hamāre ḳhvāb paTakte haiñ yuuñ hamāre sar

tamām raat sirhānoñ se ḳhuun bahtā hai

vo jañg jiit ke ūñToñ kā ruḳh badalne lage

abhī to un kī machānoñ se ḳhuun bahtā hai

ye apne daur ke sab se baḌe munāfiq haiñ

isī liye to zabānoñ se ḳhuun bahtā hai

tamām vaqt guzartā hai zaḳhm sahlāte

tarah tarah ke bahānoñ se ḳhuun bahtā hai

hameñ to ilm sikhāyā nahīñ hai thoñpā hai

hamāre ilmī ḳhazānoñ se ḳhuun bahtā hai

na jaane kitne zamāne guzar ga.e sāhir

na jaane kitne zamānoñ se ḳhuun bahtā hai

yahi nahin hai ki shanon se KHun bahta hai

abhi to apni miyanon se KHun bahta hai

wo gal surKH hue hon to yun lagen jaise

safed reshmi thanon se KHun bahta hai

ye KHamushi wo bala hai ki chiKH uTThe agar

to sunne walon ke kanon se KHun bahta hai

hamare KHwab paTakte hain yun hamare sar

tamam raat sirhanon se KHun bahta hai

wo jang jit ke unTon ka ruKH badalne lage

abhi to un ki machanon se KHun bahta hai

ye apne daur ke sab se baDe munafiq hain

isi liye to zabanon se KHun bahta hai

tamam waqt guzarta hai zaKHm sahlate

tarah tarah ke bahanon se KHun bahta hai

hamein to ilm sikhaya nahin hai thonpa hai

hamare ilmi KHazanon se KHun bahta hai

na jaane kitne zamane guzar gae sahir

na jaane kitne zamanon se KHun bahta hai