yahi nahin ki faqat baam-o-dar se bach ke chalun

yahī nahīñ ki faqat bām-o-dar se bach ke chalūñ

talāsh-e-yār meñ shams-o-qamar se bach ke chalūñ

ye rañg-o-nūr haiñ dāman-kash-e-hayāt magar

hai maslahat kā taqāzā udhar se bach ke chalūñ

ye pech-o-ḳham ye nasheb-o-farāz-e-rāh-e-hayāt

kahāñ se ho ke chalūñ aur kidhar se bach ke chalūñ

jo saath de na sake tā-harīm-e-jalva-e-nāz

maiñ chāhtā huuñ har us rahguzar se bach ke chalūñ

jahāñ jabīñ ko na hāsil ho rif.at-e-aflāk

us āstāne se us sañg-e-dar se bach ke chalūñ

maiñ mutma.in nahīñ raftār-e-kārvāñ se hanūz

ḳhatā muaaf agar rāhbar se bach ke chalūñ

maiñ rañg-e-gardish-e-daurāñ ko dekh kar 'at.har'

ye sochtā huuñ ki shām-o-sahar se bach ke chalūñ

yahi nahin ki faqat baam-o-dar se bach ke chalun

talash-e-yar mein shams-o-qamar se bach ke chalun

ye rang-o-nur hain daman-kash-e-hayat magar

hai maslahat ka taqaza udhar se bach ke chalun

ye pech-o-KHam ye nasheb-o-faraaz-e-rah-e-hayat

kahan se ho ke chalun aur kidhar se bach ke chalun

jo sath de na sake ta-harim-e-jalwa-e-naz

main chahta hun har us rahguzar se bach ke chalun

jahan jabin ko na hasil ho rifat-e-aflak

us aastane se us sang-e-dar se bach ke chalun

main mutmain nahin raftar-e-karwan se hanuz

KHata muaf agar rahbar se bach ke chalun

main rang-e-gardish-e-dauran ko dekh kar 'athar'

ye sochta hun ki sham-o-sahar se bach ke chalun