یہی نہیں اسے لکھنا سلام بھول گیا

یہی نہیں اسے لکھنا سلام بھول گیا

میں خط پہ اس کا پتہ اور نام بھول گیا

یہ ہو گیا تھا ضروری کوئی پکارے مجھے

میں ایک روز تو اپنا ہی نام بھول گیا

میں حافظے کی خرابی پہ اس لیے خوش ہوں

غنیم بھول گئے انتقام بھول گیا

کسی نے چلنا سکھایا تھا ایک بار مجھے

پھر اس کے بعد میں جیسے قیام بھول گیا

اسے کہانی سناتے ہوئے خیال آیا

میں کیا کروں گا اگر اختتام بھول گیا

نہیں جو کرنا تھے مجھ کو وہ کام یاد رہے

میں گھر سے نکلا تھا کرنے جو کام بھول گیا

کسی کے شعر تو مقسطؔ میں یاد کیا رکھتا

قسم خدا کی میں اپنا کلام بھول گیا