yahi nahin use likhna salam bhul gaya

yahī nahīñ use likhnā salām bhuul gayā

maiñ ḳhat pe us kā pata aur naam bhuul gayā

ye ho gayā thā zarūrī koī pukāre mujhe

maiñ ek roz to apnā hī naam bhuul gayā

maiñ hāfize kī ḳharābī pe is liye ḳhush huuñ

ġhanīm bhuul ga.e intiqām bhuul gayā

kisī ne chalnā sikhāyā thā ek baar mujhe

phir us ke baa'd maiñ jaise qiyām bhuul gayā

use kahānī sunāte hue ḳhayāl aayā

maiñ kyā karūñgā agar iḳhtitām bhuul gayā

nahīñ jo karnā the mujh ko vo kaam yaad rahe

maiñ ghar se niklā thā karne jo kaam bhuul gayā

kisī ke she'r to 'muqsit' maiñ yaad kyā rakhtā

qasam ḳhudā kī maiñ apnā kalām bhuul gayā

yahi nahin use likhna salam bhul gaya

main KHat pe us ka pata aur nam bhul gaya

ye ho gaya tha zaruri koi pukare mujhe

main ek roz to apna hi nam bhul gaya

main hafize ki KHarabi pe is liye KHush hun

ghanim bhul gae intiqam bhul gaya

kisi ne chalna sikhaya tha ek bar mujhe

phir us ke ba'd main jaise qiyam bhul gaya

use kahani sunate hue KHayal aaya

main kya karunga agar iKHtitam bhul gaya

nahin jo karna the mujh ko wo kaam yaad rahe

main ghar se nikla tha karne jo kaam bhul gaya

kisi ke she'r to 'muqsit' main yaad kya rakhta

qasam KHuda ki main apna kalam bhul gaya