yahi tha waqf teri mahfil-e-tarab ke liye

yahī thā vaqf tirī mahfil-e-tarab ke liye

charāġh-e-dil ki sulagtā hai aaj sab ke liye

kabhī maiñ jur.at-e-iz.hār-e-mudda.ā to karūñ

koī javāz to ho lutf-e-be-sabab ke liye

ufuq se chāñd kī champā-kalī ubhartī hai

sajā.e jaate haiñ zevar nigār-e-shab ke liye

tire gadā ne bhī sāġhar kā nuqra.ī āñchal

kahīñ se maañg liyā duḳhtar-e-enab ke liye

tamām umr ba-faiz-e-nigāh-e-lāla-ruḳhāñ

sanad rahā huuñ ishārāt-e-chashm-o-lab ke liye

chaman se phuul ke dhoke meñ chun liye sho.ale

kaf-e-vafā ke liye dāman-e-talab ke liye

kahīñ jo pursish-e-ahvāl par vo maa.il hoñ

ki ham ne dil ko sambhālā huā hai jab ke liye

mujhe ḳhabar hai bahut se matā-e-zauq-e-nazar

dukān-e-kākul-o-ruḳhsār-o-chashm-o-lab ke liye

sitāra sub.h kā raushan thā shaam se 'ābid'

yahī thī maut harīfān-e-bazm-e-shab ke liye

yahi tha waqf teri mahfil-e-tarab ke liye

charagh-e-dil ki sulagta hai aaj sab ke liye

kabhi main jurat-e-izhaar-e-muddaa to karun

koi jawaz to ho lutf-e-be-sabab ke liye

ufuq se chand ki champa-kali ubharti hai

sajae jate hain zewar nigar-e-shab ke liye

tere gada ne bhi saghar ka nuqrai aanchal

kahin se mang liya duKHtar-e-enab ke liye

tamam umr ba-faiz-e-nigah-e-lala-ruKHan

sanad raha hun ishaaraat-e-chashm-o-lab ke liye

chaman se phul ke dhoke mein chun liye shoale

kaf-e-wafa ke liye daman-e-talab ke liye

kahin jo pursish-e-ahwal par wo mail hon

ki hum ne dil ko sambhaala hua hai jab ke liye

mujhe KHabar hai bahut se mata-e-zauq-e-nazar

dukan-e-kakul-o-ruKHsar-o-chashm-o-lab ke liye

sitara subh ka raushan tha sham se 'abid'

yahi thi maut harifan-e-bazm-e-shab ke liye