yahi Thahra ki ab us or jaana bhi nahin hai

yahī Thahrā ki ab us or jaanā bhī nahīñ hai

ye duujī baat vo kūcha bhulānā bhī nahīñ hai

būe-e-sad-gul meñ bhīge ho nahā.e ho dhanak meñ

mohabbat kar rahe ho aur batānā bhī nahīñ hai

darūn-e-dil hī rakkho vaañ hifāzat meñ rahegā

vo ik rāz-e-nahufta jo chhupānā bhī nahīñ hai

na bārāñ hai nahīñ tūfāñ na jhakkaḌ hai na sarsar

mirī zambīl meñ ab ik bahānā bhī nahīñ hai

ilāqa sabz hai merā mohabbat ke shajar se

ka.ī sadiyoñ pe phailā hai purānā bhī nahīñ hai

havā de aañch dhīmī rakh sulagne de junūñ ko

ye sho.ala narm rakhnā hai jalānā bhī nahīñ hai

agarche dard kī tarsīl kā vāhid hai baa.is

junūñ pesha ne terā ġham gañvānā bhī nahīñ hai

ajab ik dhūp-chhāñv sī rachā rakhī hai tū ne

nahīñ hotā mirā lekin bigāna bhī nahīñ hai

sameTā jaa.e sad-pāra jigar yaaro ki ham ne

tamāshā-e-dil-e-ḳhasta manānā bhī nahīñ hai

yahi Thahra ki ab us or jaana bhi nahin hai

ye duji baat wo kucha bhulana bhi nahin hai

bue-e-sad-gul mein bhige ho nahae ho dhanak mein

mohabbat kar rahe ho aur batana bhi nahin hai

darun-e-dil hi rakkho wan hifazat mein rahega

wo ek raaz-e-nahufta jo chhupana bhi nahin hai

na baran hai nahin tufan na jhakkaD hai na sarsar

meri zambil mein ab ek bahana bhi nahin hai

ilaqa sabz hai mera mohabbat ke shajar se

kai sadiyon pe phaila hai purana bhi nahin hai

hawa de aanch dhimi rakh sulagne de junun ko

ye shoala narm rakhna hai jalana bhi nahin hai

agarche dard ki tarsil ka wahid hai bais

junun pesha ne tera gham ganwana bhi nahin hai

ajab ek dhup-chhanw si racha rakhi hai tu ne

nahin hota mera lekin bigana bhi nahin hai

sameTa jae sad-para jigar yaro ki hum ne

tamasha-e-dil-e-KHasta manana bhi nahin hai