yahin chalai thin kal apni kashtiyan humne

yahīñ chalā.ī thiiñ kal apnī kashtiyāñ ham ne

isī ḳharābe meñ dī thiiñ kabhī azaañ ham ne

ḳhudā kī bastī meñ rahte haiñ ik zamāne se

koī zamīn banā.ī na āsmāñ ham ne

vo jis ko kahte haiñ sab hai rag-e-gulū se qarīb

talāsh us ko kiyā hai kahāñ kahāñ ham ne

sitāre jaḌ diye palkoñ se toḌ kar ai dost

banā diyā tire dāman ko āsmāñ ham ne

tumhārī yādeñ basā liiñ haiñ apnī āñkhoñ meñ

tumhāre ġham ko hī samjhā sharīk-e-jāñ ham ne

bahut dinoñ se muqayyad the apnī āñkhoñ meñ

jo tum mile ho to dekhā hai āsmāñ ham ne

takallufāt se ham duur hī rahe 'fārūq'

na phuul dekhe na taare na titliyāñ ham ne

yahin chalai thin kal apni kashtiyan hum ne

isi KHarabe mein di thin kabhi azan hum ne

KHuda ki basti mein rahte hain ek zamane se

koi zamin banai na aasman hum ne

wo jis ko kahte hain sab hai rag-e-gulu se qarib

talash us ko kiya hai kahan kahan hum ne

sitare jaD diye palkon se toD kar ai dost

bana diya tere daman ko aasman hum ne

tumhaari yaaden basa lin hain apni aankhon mein

tumhaare gham ko hi samjha sharik-e-jaan hum ne

bahut dinon se muqayyad the apni aankhon mein

jo tum mile ho to dekha hai aasman hum ne

takallufat se hum dur hi rahe 'faruq'

na phul dekhe na tare na titliyan hum ne