yahin gird-o-nawah mein gunjti hai mere qurb-o-jawar se phuTti hai

yahīñ gird-o-navāh meñ gūñjtī hai mire qurb-o-javār se phūTtī hai

koī dūr-darāz kī chaap nahīñ jo sukūt ke paar se phūTtī hai

ye jahān-e-majāz hai aks-numā kisī aur jahāñ kī haqīqatoñ kā

yahāñ chāñd ubhartā hai pāniyoñ se dhanak ā.ina-zār se phūTtī hai

vahāñ saarī shaguft tazād se hai jahāñ hairateñ oḌh ke ghūmtā huuñ

kahīñ phuul chaTān se phūTtā hai kahīñ aag chinār se phūTtī hai

na shumāl-o-junūb meñ dekhtā huuñ na tulū-o-ġhurūb meñ dekhtā huuñ

maiñ vo barq qulūb meñ dekhtā huuñ jo tajallī-e-yār se phūTtī hai

tire arz-o-samā meñ jo garmiyāñ haiñ vo usī kī nufūz-pazīriyāñ haiñ

ye jo mauj-e-harārat umaDtī huī mire dil ke buḳhār se phūTtī hai

liye baiThe haiñ aa.ina tīrgī meñ abhī chashm-ba-rāh haiñ dekhte haiñ

pas-o-pesh se phūTtī hai vo kiran ki yamīn-o-yasār se phūTtī hai

kahīñ vādī-e-nūr meñ ruuh ke saaz pe hamdiya giit alāptā huuñ

koī jharne sī ek nashātiya dhun mirī sub.h ke taar se phūTtī hai

ye to 'aks hazār shu'ā'oñ ke haiñ jo ki ek hī 'aks meñ Dhal ga.e haiñ

ka.ī shams-o-nujūm kī raushnī hai jo hamāre ġhubār se phūTtī hai

yahin gird-o-nawah mein gunjti hai mere qurb-o-jawar se phuTti hai

koi dur-daraaz ki chap nahin jo sukut ke par se phuTti hai

ye jahan-e-majaz hai aks-numa kisi aur jahan ki haqiqaton ka

yahan chand ubharta hai paniyon se dhanak aaina-zar se phuTti hai

wahan sari shaguft tazad se hai jahan hairaten oDh ke ghumta hun

kahin phul chaTan se phuTta hai kahin aag chinar se phuTti hai

na shumal-o-junub mein dekhta hun na tulu-o-ghurub mein dekhta hun

main wo barq qulub mein dekhta hun jo tajalli-e-yar se phuTti hai

tere arz-o-sama mein jo garmiyan hain wo usi ki nufuz-paziriyan hain

ye jo mauj-e-hararat umaDti hui mere dil ke buKHar se phuTti hai

liye baiThe hain aaina tirgi mein abhi chashm-ba-rah hain dekhte hain

pas-o-pesh se phuTti hai wo kiran ki yamin-o-yasar se phuTti hai

kahin wadi-e-nur mein ruh ke saz pe hamdiya git alapta hun

koi jharne si ek nashatiya dhun meri subh ke tar se phuTti hai

ye to 'aks hazar shu'a'on ke hain jo ki ek hi 'aks mein Dhal gae hain

kai shams-o-nujum ki raushni hai jo hamare ghubar se phuTti hai