yak-ba-yak chhoD ke mano koi tanha TuTe

yak-ba-yak chhoḌ ke maano koī tanhā TuuTe

jaise patjhaḌ meñ koī shāḳh se pattā TuuTe

ab koī had hī nahīñ mere bikhar jaane kī

jo mujhe dekh le vo dekh ke kitnā TuuTe

jaise sāvan kī ghaTā jam ke baras jaa.e hai

tū mire paas meñ aa jaa.e to aisā TuuTe

fikr-o-ehsās kī ye gard bahut chhā.ī hai

aañkh se dhundh chhaTe tab kahīñ nashsha TuuTe

ek muddat huī us ko nahīñ dekhā maiñ ne

ek muddat huī āñkhoñ se ujālā TuuTe

yā mirī niiñd kā ye ḳhvāb ho paiġhām-e-ajal

yā tire sāmne se ḳhvāb kā dariyā TuuTe

terī āvāz har ik dard bayāñ kartī hai

tū agar sāmne aa jaa.e to kitnā TuuTe

dil dhaḌaktā huā mehrāb-e-mohabbat ke qarīb

vo chalā jaa.e to phir dekhiye kyā kyā TuuTe

aisī vīrāniyāñ har ghar ko miTā detī haiñ

jaise marte hue ḳhud ghar meñ akelā TuuTe

ziist meñ aisī hī ik shaam bhī aa jaa.e kabhī

phir mirī yaad meñ ek dam se vo tanhā TuuTe

āsmāñ āñkhoñ kā be-nūr huā jaatā hai

maiñ tirā naam luuñ aur ek sitārā TuuTe

maiñ sar-e-shām du'ā-go huuñ ḳhudā se 'arpit'

vo jo aa jaa.e to is ghar kā añdherā TuuTe

yak-ba-yak chhoD ke mano koi tanha TuTe

jaise patjhaD mein koi shaKH se patta TuTe

ab koi had hi nahin mere bikhar jaane ki

jo mujhe dekh le wo dekh ke kitna TuTe

jaise sawan ki ghaTa jam ke baras jae hai

tu mere pas mein aa jae to aisa TuTe

fikr-o-ehsas ki ye gard bahut chhai hai

aankh se dhundh chhaTe tab kahin nashsha TuTe

ek muddat hui us ko nahin dekha main ne

ek muddat hui aankhon se ujala TuTe

ya meri nind ka ye KHwab ho paigham-e-ajal

ya tere samne se KHwab ka dariya TuTe

teri aawaz har ek dard bayan karti hai

tu agar samne aa jae to kitna TuTe

dil dhaDakta hua mehrab-e-mohabbat ke qarib

wo chala jae to phir dekhiye kya kya TuTe

aisi viraniyan har ghar ko miTa deti hain

jaise marte hue KHud ghar mein akela TuTe

zist mein aisi hi ek sham bhi aa jae kabhi

phir meri yaad mein ek dam se wo tanha TuTe

aasman aankhon ka be-nur hua jata hai

main tera nam lun aur ek sitara TuTe

main sar-e-sham du'a-go hun KHuda se 'arpit'

wo jo aa jae to is ghar ka andhera TuTe