yaksan lagen hain un ko to dair-o-haram baham

yaksāñ lageñ haiñ un ko to dair-o-haram baham

jo pūjte haiñ dil meñ ḳhudā-o-sanam baham

dekhā to ek sho.ale se ai shaiḳh-o-barhaman

raushan haiñ sham-e-dair o charāġh-e-haram baham

bārīk haiñ dahan se tire vaqt-e-ḳhanda yaar

karte haiñ dīd-e-hastī o sair-e-adam baham

nāseh na ham tirī na hamārī sunegā tū

kyā fā.eda jo bahs kareñ do asam baham

ḳhar-mastiyoñ pe mohtasib aatā hai chal 'baqā'

bāñdheñ ham is himār ke donoñ qadam baham

yaksan lagen hain un ko to dair-o-haram baham

jo pujte hain dil mein KHuda-o-sanam baham

dekha to ek shoale se ai shaiKH-o-barhaman

raushan hain sham-e-dair o charagh-e-haram baham

barik hain dahan se tere waqt-e-KHanda yar

karte hain did-e-hasti o sair-e-adam baham

naseh na hum teri na hamari sunega tu

kya faeda jo bahs karen do asam baham

KHar-mastiyon pe mohtasib aata hai chal 'baqa'

bandhen hum is himar ke donon qadam baham