yaksar is pur-amn faza mein jaane kaisa shor khula

yaksar is pur-amn fazā meñ jaane kaisā shor khulā

chīḳh uThā ḳhāmosh gaDariyā jangal jaagā shor khulā

duur se dekh ke lagtā thā ḳhāmosh rahegā aise hī

jab dariyā meñ utar ga.e to ham par us kā shor khulā

shoḳh tabī'at thī apnī aur bāteñ ḳhatm na hotī thiiñ

chup ke mā'nī khul ga.e ham par ik din aisā shor khulā

ḳhāmoshī to samajh ga.e the ḳhud se pahle vāloñ kī

lekin baa'd meñ aane vāloñ par na hamārā shor khulā

āḳhir ham ne ḳhud ko bharne kī bandish pe ġhaur kiyā

ḳhālī-pan meñ khol chuke the ham se jitnā shor khulā

yaksar is pur-amn faza mein jaane kaisa shor khula

chiKH uTha KHamosh gaDariya jangal jaga shor khula

dur se dekh ke lagta tha KHamosh rahega aise hi

jab dariya mein utar gae to hum par us ka shor khula

shoKH tabi'at thi apni aur baaten KHatm na hoti thin

chup ke ma'ni khul gae hum par ek din aisa shor khula

KHamoshi to samajh gae the KHud se pahle walon ki

lekin ba'd mein aane walon par na hamara shor khula

aaKHir hum ne KHud ko bharne ki bandish pe ghaur kiya

KHali-pan mein khol chuke the hum se jitna shor khula