yaqin kaise kaise guman kaise kaise

yaqīñ kaise kaise gumāñ kaise kaise

haiñ ābād mujh meñ jahāñ kaise kaise

falak par milīñ kaisī kaisī zamīneñ

zamīn par hue āsmāñ kaise kaise

ubhar aa.e dhartī pe kyā kyā jazīre

samundar hue be nishāñ kaise kaise

zamāne ne bo.e haiñ sahrā-o-dariyā

tire aur mire darmiyāñ kaise kaise

javānī se labrez muflis badan par

uThīñ vaqt kī uñgliyāñ kaise kaise

mire daur kī ḳhushnumā bastiyoñ meñ

mile jañgaloñ ke nishāñ kaise kaise

mirī soch ke dilrubā sāhiloñ par

utarte rahe kārvāñ kaise kaise

ḳhizāoñ meñ bhī lahlahātī rahī haiñ

tirī yaad kī titliyāñ kaise kaise

tirī baat har din sunātī haiñ mujh ko

sahar kī dil-āveziyāñ kaise kaise

tire vasl meñ jo jo bolā kiye hai

to dhaḌkā kiye hai zabāñ kaise kaise

javānī ne dil kaise kaise jagāyā

buḌhāpe ne diiñ loriyāñ kaise kaise

'rafī.a' aur 'iqbāl' kī sarzamīñ par

ġhazal-ḳhvāñ haiñ ahl-e-zabāñ kaise kaise

yaqin kaise kaise guman kaise kaise

hain aabaad mujh mein jahan kaise kaise

falak par milin kaisi kaisi zaminen

zamin par hue aasman kaise kaise

ubhar aae dharti pe kya kya jazire

samundar hue be nishan kaise kaise

zamane ne boe hain sahra-o-dariya

tere aur mere darmiyan kaise kaise

jawani se labrez muflis badan par

uThin waqt ki ungliyan kaise kaise

mere daur ki KHushnuma bastiyon mein

mile jangalon ke nishan kaise kaise

meri soch ke dilruba sahilon par

utarte rahe karwan kaise kaise

KHizaon mein bhi lahlahati rahi hain

teri yaad ki titliyan kaise kaise

teri baat har din sunati hain mujh ko

sahar ki dil-aweziyan kaise kaise

tere wasl mein jo jo bola kiye hai

to dhaDka kiye hai zaban kaise kaise

jawani ne dil kaise kaise jagaya

buDhape ne din loriyan kaise kaise

'rafia' aur 'iqbaal' ki sarzamin par

ghazal-KHwan hain ahl-e-zaban kaise kaise