yaqin kaise karunga guman mein rahta hun

yaqīn kaise karūñgā gumāñ meñ rahtā huuñ

charāġh huuñ kisī andhe makāñ meñ rahtā huuñ

chahār samt ujālā hai mere hone se

maiñ har taraf huuñ magar darmiyāñ meñ rahtā huuñ

mujhe talāsh karo mujh se guftugū kar lo

meñ apne harf meñ apne bayāñ meñ rahtā huuñ

haqīr sā mirā kirdār hai kahānī meñ

misāl-e-gard kahīñ kārvāñ meñ rahtā huuñ

sadā bhī apnī hī aatī hai mere kānoñ meñ

jahāñ bhī rahtā huuñ apne gumāñ meñ rahtā huuñ

na sub.h koī yahāñ aur na shaam hai apnī

kisī se kaise kahūñgā kahāñ maiñ rahtā huuñ

na bām-o-dar haiñ nā dīvār hai koī jis kī

maiñ āj-kal kisī aise makāñ meñ rahtā huuñ

mujhe bhī yaad karegā kabhī koī 'hamdam'

kahīñ to maiñ bhī kisī dāstāñ meñ rahtā huuñ

yaqin kaise karunga guman mein rahta hun

charagh hun kisi andhe makan mein rahta hun

chahaar samt ujala hai mere hone se

main har taraf hun magar darmiyan mein rahta hun

mujhe talash karo mujh se guftugu kar lo

mein apne harf mein apne bayan mein rahta hun

haqir sa mera kirdar hai kahani mein

misal-e-gard kahin karwan mein rahta hun

sada bhi apni hi aati hai mere kanon mein

jahan bhi rahta hun apne guman mein rahta hun

na subh koi yahan aur na sham hai apni

kisi se kaise kahunga kahan main rahta hun

na baam-o-dar hain na diwar hai koi jis ki

main aaj-kal kisi aise makan mein rahta hun

mujhe bhi yaad karega kabhi koi 'hamdam'

kahin to main bhi kisi dastan mein rahta hun