yaqin ki had se jo nikle guman tak pahunche

yaqīñ kī had se jo nikle gumān tak pahuñche

taḳhayyulāt kī ūñchī uḌaan tak pahuñche

use bhī thoḌā sā ehsās-e-zulm ho jaa.e

palaT ke tiir koī gar kamān tak pahuñche

na vo hī paḌh sakā āñkhoñ meñ merī haal merā

na lafz dil ke hī merī zabān tak pahuñche

bhalā ye fan hai ke hāsil riyāz se ho jaa.e

kabhī to koī du'ā āsmān tak pahuñche

'ajab sī be-hisī miTTī ke is makān meñ thī

so jism chhoḌ diyā lā-makān tak pahuñche

kitāb-e-zīst ke aurāq khul uThe jis dam

vo paḌhte paḌhte mirī dāstān tak pahuñche

yaqin ki had se jo nikle guman tak pahunche

taKHayyulat ki unchi uDan tak pahunche

use bhi thoDa sa ehsas-e-zulm ho jae

palaT ke tir koi gar kaman tak pahunche

na wo hi paDh saka aankhon mein meri haal mera

na lafz dil ke hi meri zaban tak pahunche

bhala ye fan hai ke hasil riyaz se ho jae

kabhi to koi du'a aasman tak pahunche

'ajab si be-hisi miTTi ke is makan mein thi

so jism chhoD diya la-makan tak pahunche

kitab-e-zist ke auraq khul uThe jis dam

wo paDhte paDhte meri dastan tak pahunche