yaqin ki KHak uDate guman banate hain

yaqīñ kī ḳhaak uḌāte gumāñ banāte haiñ

magar ye turfa imārat kahāñ banāte haiñ

lagā rahe haiñ na.e zā.eqoñ ke zaḳhm abhī

asās-e-fikr na tarz-e-bayāñ banāte haiñ

qarīb-o-dūr se bejoḌ aks ashiyā ke

talāsh karte haiñ aur dāstāñ banāte haiñ

ki mil sake na hamārā surāġh ham ko bhī

binā-e-abr-o-havā par makāñ banāte haiñ

purāne zulm meñ lazzat nahīñ hamāre liye

ham apne sar pe nayā āsmāñ banāte haiñ

nahīñ nasīb meñ marnā savād-e-sāhil par

jo Dūbne ke liye kashtiyāñ banāte haiñ

falak pe DhūñDte haiñ gard-e-rañg-e-rafta-e-dil

zamīñ pe shām-e-talab kā nishāñ banāte haiñ

vo jis kī lai pe laraztā hai barg barg badan

us ek rañg se naqsh-e-ḳhizāñ banāte haiñ

'zafar' ye vaqt hī batlā.egā ki āḳhir ham

bigāḌte haiñ zabāñ yā zabāñ banāte haiñ

yaqin ki KHak uDate guman banate hain

magar ye turfa imarat kahan banate hain

laga rahe hain nae zaeqon ke zaKHm abhi

asas-e-fikr na tarz-e-bayan banate hain

qarib-o-dur se bejoD aks ashiya ke

talash karte hain aur dastan banate hain

ki mil sake na hamara suragh hum ko bhi

bina-e-abr-o-hawa par makan banate hain

purane zulm mein lazzat nahin hamare liye

hum apne sar pe naya aasman banate hain

nahin nasib mein marna sawad-e-sahil par

jo Dubne ke liye kashtiyan banate hain

falak pe DhunDte hain gard-e-rang-e-rafta-e-dil

zamin pe sham-e-talab ka nishan banate hain

wo jis ki lai pe larazta hai barg barg badan

us ek rang se naqsh-e-KHizan banate hain

'zafar' ye waqt hi batlaega ki aaKHir hum

bigaDte hain zaban ya zaban banate hain