yaqin ki ret pe Khaali sarab bunti hun

yaqīñ kī ret pe ḳhālī sarāb buntī huuñ

jhalaktī aañkh meñ an-dekhe ḳhvāb buntī huuñ

mire vajūd kī zulmat pe bolne vaale

maiñ diida tar se ka.ī āftāb buntī huuñ

ye dhuup chaah kī jhulsā na de kahīñ mujh ko

tumhārī yaad se aksar sahāb buntī huuñ

huuñ rasan-o-dār ke qābil hai e'tirāf mujhe

ki ratjagoñ kī sifārish pe ḳhvāb buntī huuñ

tū mere paas mahaktā hai ḳhushbuoñ kī tarah

tire rumāl pe jab jab gulāb buntī huuñ

yaqin ki ret pe KHali sarab bunti hun

jhalakti aankh mein an-dekhe KHwab bunti hun

mere wajud ki zulmat pe bolne wale

main dida tar se kai aaftab bunti hun

ye dhup chah ki jhulsa na de kahin mujh ko

tumhaari yaad se aksar sahab bunti hun

hun rasan-o-dar ke qabil hai e'tiraf mujhe

ki ratjagon ki sifarish pe KHwab bunti hun

tu mere pas mahakta hai KHushbuon ki tarah

tere rumal pe jab jab gulab bunti hun