yaqin un pe lane ko ji chahta hai

yaqīñ un pe laane ko jī chāhtā hai

fareboñ meñ aane ko jī chāhtā hai

sitāroñ meñ o duur se hañsne vaale

tire paas aane ko jī chāhtā hai

ba-zor-e-niyāz āstāñ ko kisī ke

jabīñ tak bulāne ko jī chāhtā hai

mohabbat meñ itnā huuñ mahv-e-mohabbat

unheñ bhī bhulāne ko jī chāhtā hai

hasīñ jis ke din hoñ hasīñ jis kī rāteñ

vo duniyā basāne ko jī chāhtā hai

qasam hai tujhe muskurā be-takalluf

miTā gar miTāne ko jī chāhtā hai

jahāñ tum farozāñ nazar aa rahe ho

vahīñ jagmagāne ko jī chāhtā hai

hai jis meñ ḳhud apnī tajallī kā dhokā

vo parda uThāne ko jī chāhtā hai

salāmat rahe rif.at-e-ishq hamdam

kahāñ sar jhukāne ko jī chāhtā hai

dam-e-sub.h lab-basta kaliyoñ ko jā kar

'shifā' gudgudāne ko jī chāhtā hai

yaqin un pe lane ko ji chahta hai

farebon mein aane ko ji chahta hai

sitaron mein o dur se hansne wale

tere pas aane ko ji chahta hai

ba-zor-e-niyaz aastan ko kisi ke

jabin tak bulane ko ji chahta hai

mohabbat mein itna hun mahw-e-mohabbat

unhen bhi bhulane ko ji chahta hai

hasin jis ke din hon hasin jis ki raaten

wo duniya basane ko ji chahta hai

qasam hai tujhe muskura be-takalluf

miTa gar miTane ko ji chahta hai

jahan tum farozan nazar aa rahe ho

wahin jagmagane ko ji chahta hai

hai jis mein KHud apni tajalli ka dhoka

wo parda uThane ko ji chahta hai

salamat rahe rifat-e-ishq hamdam

kahan sar jhukane ko ji chahta hai

dam-e-subh lab-basta kaliyon ko ja kar

'shifa' gudgudane ko ji chahta hai