یقیناً آپ کو دھوکا ہوا ہے

یقیناً آپ کو دھوکا ہوا ہے

وگرنہ کیا کبھی ایسا ہوا ہے

یہ کس کے حسن کا چرچا ہوا ہے

کہ سارا شہر دیوانہ ہوا ہے

چراغ درد روشن ہو ادھر بھی

ادھر ہی زخم کیوں تازہ ہوا ہے

ہمیں بھی خاک ہونا ہے وہاں تک

جہاں تک آسماں پھیلا ہوا ہے

میں جس سے خود کنارہ کر چکا تھا

مقابل پھر وہی دریا ہوا ہے

کجی ہے خود ہمارے دیکھنے میں

کہ رخ اس کا ہی کچھ بدلا ہوا ہے

ابھی کیا جان کی بازی لگائیں

ابھی نقصان ہی کتنا ہوا ہے