ye aabru ye shan ye tewar bacha ke rakh

ye aabrū ye shaan ye tevar bachā ke rakh

dil ko tū ḳhvāhishoñ se qalandar bachā ke rakh

mahloñ kī fikr chhoḌ ki barsāt hai qarīb

āñdhī se apnā phuus kā chhappar bachā ke rakh

chāroñ taraf hai aag chaman meñ lagī huī

apnā vajūd mom ke paikar bachā ke rakh

kangāl kar na de tujhe qatroñ kī parvarish

kuchh apne paas bhī to samundar bachā ke rakh

mujh par na ḳhatm hogā sadāqat kā silsila

tarkash meñ apne tiir sitamgar bachā ke rakh

badlī huī hai vaqt kī raftār āj-kal

zauq-e-safar ko vaqt ke rahbar bachā ke rakh

parkhegā vaqt tujh ko kasauTī pe baar baar

'anvar-kamāl’ apne tū jauhar bachā ke rakh

ye aabru ye shan ye tewar bacha ke rakh

dil ko tu KHwahishon se qalandar bacha ke rakh

mahlon ki fikr chhoD ki barsat hai qarib

aandhi se apna phus ka chhappar bacha ke rakh

chaaron taraf hai aag chaman mein lagi hui

apna wajud mom ke paikar bacha ke rakh

kangal kar na de tujhe qatron ki parwarish

kuchh apne pas bhi to samundar bacha ke rakh

mujh par na KHatm hoga sadaqat ka silsila

tarkash mein apne tir sitamgar bacha ke rakh

badli hui hai waqt ki raftar aaj-kal

zauq-e-safar ko waqt ke rahbar bacha ke rakh

parkhega waqt tujh ko kasauTi pe bar bar

'anwar-kamal’ apne tu jauhar bacha ke rakh