ye aag mohabbat ki bujhae na bujhe hai

ye aag mohabbat kī bujhā.e na bujhe hai

bujh jaa.e jo ik baar jalā.e na jale hai

TuuTā jo bharam rishtoñ meñ ehsās-o-vafā kā

sau tarah nibhāo to nibhā.e na nibhe hai

ḳhvāboñ kā mahal yuuñ hī banāyā na karo tum

ta.amīr jo ho jaa.e girā.e na gire hai

dahlīz pe dil kī jo qadam rakkhe hai koī

Tik jaa.e hai aise ke hilā.e na hile hai

hai bāġh-e-mohabbat meñ vafā kā jo hasīñ gul

murjhā jo gayā phir to khilā.e na khile hai

dil chiiz hai aisī ki ujaḌ jaa.e jo ek baar

phir laakh basāo to basā.e na base hai

kyuuñ naqsh liye chashm-e-tasavvur meñ phiro ho

ho jaa.e ye gahrā to miTā.e na miTe hai

koshish to bahut kī hai ki dhul jaa.e har ik aks

ik shakl hai aisī ki bahā.e na bahe hai

dekh aa.ī haiñ shāyad kahīñ mahbūb ko apne

āñkhoñ kī chamak aaj chhupā.e na chhupe hai

bātoñ man jo kar jaa.e hai iqrār-e-mohabbat

phir baat koī us se banā.e na bane hai

har-gām qadam apnā sambhāle rakho 'asrā'

dāman pe lagā daaġh chhuḌā.e na chhuTe hai

ye aag mohabbat ki bujhae na bujhe hai

bujh jae jo ek bar jalae na jale hai

TuTa jo bharam rishton mein ehsas-o-wafa ka

sau tarah nibhao to nibhae na nibhe hai

KHwabon ka mahal yun hi banaya na karo tum

tamir jo ho jae girae na gire hai

dahliz pe dil ki jo qadam rakkhe hai koi

Tik jae hai aise ke hilae na hile hai

hai bagh-e-mohabbat mein wafa ka jo hasin gul

murjha jo gaya phir to khilae na khile hai

dil chiz hai aisi ki ujaD jae jo ek bar

phir lakh basao to basae na base hai

kyun naqsh liye chashm-e-tasawwur mein phiro ho

ho jae ye gahra to miTae na miTe hai

koshish to bahut ki hai ki dhul jae har ek aks

ek shakl hai aisi ki bahae na bahe hai

dekh aai hain shayad kahin mahbub ko apne

aankhon ki chamak aaj chhupae na chhupe hai

baaton man jo kar jae hai iqrar-e-mohabbat

phir baat koi us se banae na bane hai

har-gam qadam apna sambhaale rakho 'asra'

daman pe laga dagh chhuDae na chhuTe hai