یہ آگہی مری کچھ کام ایسا کر جائے

یہ آگہی مری کچھ کام ایسا کر جائے

جدھر جدھر میں چلوں ساتھ رہ گزر جائے

جو وقت آئے گا سب کچھ تباہ کر دے گا

دعائیں مانگو یہیں وقت اب ٹھہر جائے

میں تھک چکا ہوں یہ سمجھا کے اپنے لوگوں کو

ادھر نہ جاؤ جدھر کوئی راہبر جائے

ٹکی ہوئی ہے نظر اب زوال منظر پر

کبھی کبھی تو یہ بھٹکے ادھر ادھر جائے

وہ چاند چھپ گیا جو داد حسن چاہتا تھا

تو کس کے واسطے اب بام پر نظر جائے

بدلتی رت کی ادا دیکھ کر خیال آیا

ہوا کے ساتھ کسی دن نہ اپنا سر جائے

عبادتوں میں ہوں شامل محبتیں بھی ریاضؔ

کوئی تو راستہ ایسا کسی نگر جائے