ye aagahi meri kuchh kaam aisa kar jae

ye āgahī mirī kuchh kaam aisā kar jaa.e

jidhar jidhar maiñ chalūñ saath rahguzar jaa.e

jo vaqt aa.egā sab kuchh tabāh kar degā

du'ā.eñ māñgo yahīñ vaqt ab Thahar jaa.e

maiñ thak chukā huuñ ye samjhā ke apne logoñ ko

udhar na jaao jidhar koī rāhbar jaa.e

Tikī huī hai nazar ab zavāl-e-manzar par

kabhī kabhī to ye bhaTke idhar udhar jaa.e

vo chāñd chhup gayā jo dād-e-husn chāhtā thā

to kis ke vāste ab baam par nazar jaa.e

badaltī rut kī adā dekh kar ḳhayāl aaya

havā ke saath kisī din na apnā sar jaa.e

'ibādatoñ meñ hoñ shāmil mohabbateñ bhī 'riyāz'

koī to rāsta aisā kisī nagar jaa.e

ye aagahi meri kuchh kaam aisa kar jae

jidhar jidhar main chalun sath rahguzar jae

jo waqt aaega sab kuchh tabah kar dega

du'aen mango yahin waqt ab Thahar jae

main thak chuka hun ye samjha ke apne logon ko

udhar na jao jidhar koi rahbar jae

Tiki hui hai nazar ab zawal-e-manzar par

kabhi kabhi to ye bhaTke idhar udhar jae

wo chand chhup gaya jo dad-e-husn chahta tha

to kis ke waste ab baam par nazar jae

badalti rut ki ada dekh kar KHayal aaya

hawa ke sath kisi din na apna sar jae

'ibaadaton mein hon shamil mohabbaten bhi 'riyaz'

koi to rasta aisa kisi nagar jae