ye aah-e-parda-dar aisi hui adu meri

ye āh-e-parda-dar aisī huī adū merī

habāb ho ga.ī āḳhir ko aabrū merī

na apnī ḳhud-ġharzī hai na hī shikāyat-e-dost

hai ishq-o-husn ke mābain guftugū merī

koī nikalne na degā zamīn ho ki falak

zamāne-bhar ke muqābil hai aarzū merī

qinā ke ba.ad maiñ detā nahīñ kisī ko javāb

sifat thī aap kī jo ab huī vo ḳhuuñ merī

zabāñ hile na hile dil hile to kaam chale

ye zalzala ho to aa jaa.e guftugū merī

bhulā diyā mujhe tū ne tujhe maiñ kho baiThā

na maiñ tirā huā ai zindagī na tū merī

mujhe zamāne se shikva nahīñ ki behis hai

samajhne vaale samajhte haiñ guftugū merī

mire karīm mirī sharm hashr meñ rakh le

araq ke saath Tapaktī hai aabrū merī

ye ek vādī-e-pur-ḳhār-e-ishq thī 'sāqib'

ulajh ke rah ga.ī har dil meñ guftugū merī

ye aah-e-parda-dar aisi hui adu meri

habab ho gai aaKHir ko aabru meri

na apni KHud-gharzi hai na hi shikayat-e-dost

hai ishq-o-husn ke mabain guftugu meri

koi nikalne na dega zamin ho ki falak

zamane-bhar ke muqabil hai aarzu meri

qina ke baad main deta nahin kisi ko jawab

sifat thi aap ki jo ab hui wo KHun meri

zaban hile na hile dil hile to kaam chale

ye zalzala ho to aa jae guftugu meri

bhula diya mujhe tu ne tujhe main kho baiTha

na main tera hua ai zindagi na tu meri

mujhe zamane se shikwa nahin ki behis hai

samajhne wale samajhte hain guftugu meri

mere karim meri sharm hashr mein rakh le

araq ke sath Tapakti hai aabru meri

ye ek wadi-e-pur-KHar-e-ishq thi 'saqib'

ulajh ke rah gai har dil mein guftugu meri