ye aalam ab dhuen ka kar-KHana lag raha hai

ye 'ālam ab dhueñ kā kār-ḳhāna lag rahā hai

barāh-e-rāst sāñsoñ par nishāna lag rahā hai

hamāre 'ahd kī haivāniyat kā surḳh qissa

qurūn-e-jāhiliyyat kā fasāna lag rahā hai

charāġhoñ ko muhayyā kījiye sūraj-panāhī

havāoñ kā ravayya jārihāna lag rahā hai

tirā mamnūn huuñ ai jazba-e-sahrā-navardī

sulagtī ret kā manzar suhānā lag rahā hai

hamārī vaz'-dārī ko sarāho chārasāzo

nayā zaḳhm-e-ta.alluq bhī purānā lag rahā hai

ham apne sabz-o-nam uslūb ke maare hue haiñ

nayā lahja bhī ab ham ko purānā lag rahā hai

kisī āhañg-e-nau kī justujū meñ hai musalsal

ye merā dil jo be-tabl-o-tarāna lag rahā hai

hazāroñ sūrateñ haiñ mun.akis chehra-ba-chehra

makān-e-shash-jihat ā.īna-ḳhāna lag rahā hai

hameñ darkār hai ik dūsre kā kāsa-e-sar

ba-zāhir ham meñ gahrā dostāna lag rahā hai

zamīñ kī gahrī ḳhāmoshī nahīñ be-vaj.h 'jauhar'

zamīñ meñ dafn rāzoñ kā ḳhazāna lag rahā hai

ye 'alam ab dhuen ka kar-KHana lag raha hai

barah-e-rast sanson par nishana lag raha hai

hamare 'ahd ki haiwaniyat ka surKH qissa

qurun-e-jahiliyyat ka fasana lag raha hai

charaghon ko muhayya kijiye suraj-panahi

hawaon ka rawayya jarihana lag raha hai

tera mamnun hun ai jazba-e-sahra-nawardi

sulagti ret ka manzar suhana lag raha hai

hamari waz'-dari ko saraho chaarasazo

naya zaKHm-e-talluq bhi purana lag raha hai

hum apne sabz-o-nam uslub ke mare hue hain

naya lahja bhi ab hum ko purana lag raha hai

kisi aahang-e-nau ki justuju mein hai musalsal

ye mera dil jo be-tabl-o-tarana lag raha hai

hazaron suraten hain munakis chehra-ba-chehra

makan-e-shash-jihat aaina-KHana lag raha hai

hamein darkar hai ek dusre ka kasa-e-sar

ba-zahir hum mein gahra dostana lag raha hai

zamin ki gahri KHamoshi nahin be-wajh 'jauhar'

zamin mein dafn raazon ka KHazana lag raha hai