ye aankh bhi ye KHwab bhi ye raat usi ki

ye aañkh bhī ye ḳhvāb bhī ye raat usī kī

har baat pe yaad aa.ī hai har baat usī kī

jugnū se chamakte haiñ usī yaad ke har-dam

āñkhoñ meñ liye phirte haiñ sauġhāt usī kī

har sho.ale ke pīchhe hai usī aag kī sūrat

har baat ke parde meñ hikāyāt usī kī

phir vahshat-e-dil DhūñDhtī phirtī hai hamesha

dīvāngī-e-ġham pe mudārāt usī kī

ā.īne kā aur aks kā rishta mirā us kā

ab jiit mirī us kī hai aur maat usī kī

lafzoñ meñ sajāte haiñ usī husn kī ḳhushbū

āñkhoñ meñ chhupāte haiñ shikāyāt usī kī

kyā kījiye achchhī hameñ lagtī hai hamesha

dīvāngī-e-dil meñ har ik baat usī kī

jis shaḳhs ne manzar ko na.e phuul diye the

haiñ daur-e-ḳhizāñ par bhī ināyāt usī kī

aatā hai nazar majma-e-ahbāb meñ 'ādil'

lākhoñ meñ akelī hai magar zaat usī kī

ye aankh bhi ye KHwab bhi ye raat usi ki

har baat pe yaad aai hai har baat usi ki

jugnu se chamakte hain usi yaad ke har-dam

aankhon mein liye phirte hain saughat usi ki

har shoale ke pichhe hai usi aag ki surat

har baat ke parde mein hikayat usi ki

phir wahshat-e-dil DhunDhti phirti hai hamesha

diwangi-e-gham pe mudaraat usi ki

aaine ka aur aks ka rishta mera us ka

ab jit meri us ki hai aur mat usi ki

lafzon mein sajate hain usi husn ki KHushbu

aankhon mein chhupate hain shikayat usi ki

kya kijiye achchhi hamein lagti hai hamesha

diwangi-e-dil mein har ek baat usi ki

jis shaKHs ne manzar ko nae phul diye the

hain daur-e-KHizan par bhi inayat usi ki

aata hai nazar majma-e-ahbab mein 'adil'

lakhon mein akeli hai magar zat usi ki