ye aankhen khulin jab se kya kya na dekha

ye āñkheñ khulīñ jab se kyā kyā na dekhā

magar dekhnā jis ko chāhā na dekhā

ye tanhā.ī-e-dasht-e-ġhurbat kī had hai

kabhī dhuup meñ apnā saayā na dekhā

butoñ kī jagah aur āshiq ke dil meñ

yahī sang-o-shīsha meñ yaarā na dekhā

agar diid se kaam hī kuchh na niklā

to kyā fā.eda jaise dekhā na dekhā

lahū se bharī apnī chuTkī to dhoī

magar tum ne merā kalejā na dekhā

burā maan jātīñ vo bīmār āñkheñ

ye achchhā huā tujh ko achchhā na dekhā

mirī chashm-e-pur-āb ab tum ne dekhī

na kahnā ki kuuze meñ dariyā na dekhā

yahāñ dair meñ kī ziyārat butoñ kī

vahāñ kuchh haram meñ na paayā na dekhā

ye aankhen khulin jab se kya kya na dekha

magar dekhna jis ko chaha na dekha

ye tanhai-e-dasht-e-ghurbat ki had hai

kabhi dhup mein apna saya na dekha

buton ki jagah aur aashiq ke dil mein

yahi sang-o-shisha mein yara na dekha

agar did se kaam hi kuchh na nikla

to kya faeda jaise dekha na dekha

lahu se bhari apni chuTki to dhoi

magar tum ne mera kaleja na dekha

bura man jatin wo bimar aankhen

ye achchha hua tujh ko achchha na dekha

meri chashm-e-pur-ab ab tum ne dekhi

na kahna ki kuze mein dariya na dekha

yahan dair mein ki ziyarat buton ki

wahan kuchh haram mein na paya na dekha