ye aankhon hi aankhon mein kya ho gae hum

ye āñkhoñ hī āñkhoñ meñ kyā ho ga.e ham

abhī jāgte the abhī so ga.e ham

maqām-e-tajassus ik aisā bhī aayā

ki paayā tujhe aur ḳhud kho ga.e ham

tire ġham ko ḳhud se bhī ham ne chhupāyā

magar phir bhī rusvā-e-ġham ho ga.e ham

jo ab tak the zeb-e-qabā-e-mohabbat

kuchh aise bhī motī kabhī ro ga.e ham

anāsir ne liiñ hichkiyāñ saañs ukhḌī

kahā ishq ne jāvedāñ ho ga.e ham

ye me.arāj-e-dard-e-mohabbat hai shāyad

ki terī nazar meñ bhī ġham bo ga.e ham

taḌapne meñ 'altāf' vo lazzateñ thiiñ

ki taḌpe na jī bhar ke aur so ga.e ham

ye aankhon hi aankhon mein kya ho gae hum

abhi jagte the abhi so gae hum

maqam-e-tajassus ek aisa bhi aaya

ki paya tujhe aur KHud kho gae hum

tere gham ko KHud se bhi hum ne chhupaya

magar phir bhi ruswa-e-gham ho gae hum

jo ab tak the zeb-e-qaba-e-mohabbat

kuchh aise bhi moti kabhi ro gae hum

anasir ne lin hichkiyan sans ukhDi

kaha ishq ne jawedan ho gae hum

ye mearaj-e-dard-e-mohabbat hai shayad

ki teri nazar mein bhi gham bo gae hum

taDapne mein 'altaf' wo lazzaten thin

ki taDpe na ji bhar ke aur so gae hum