ye aasman zamin ke honT chumta hua na ho

ye āsmāñ zamīñ ke hoñT chūmtā huā na ho

kise ḳhabar hai kal talak yahāñ pe kyā ho kyā na ho

vo mujh se mil ke bhī kisī se vasl kī duā kare

ajiib peḌ hai jo paanī pī ke bhī harā na ho

ye dastakeñ kivāḌ par baras rahī haiñ jis tarah

kivāḌ hī kī nabz-āshnā koī havā na ho

vo kam-suḳhan sahī magar koī to aur baat hai

ḳhamoshiyoñ kī aaḌ meñ vo dard sah rahā na ho

maiñ tum se apne dil kī vārdāt kah to duuñ magar

agar hamārā rāsta yahīñ kahīñ judā na ho

gale lagā rahī ho to ḳhayāl bhī rahe 'ufuq'

tumheñ jo ishq lag rahā hai asl meñ balā na ho

ye aasman zamin ke honT chumta hua na ho

kise KHabar hai kal talak yahan pe kya ho kya na ho

wo mujh se mil ke bhi kisi se wasl ki dua kare

ajib peD hai jo pani pi ke bhi hara na ho

ye dastaken kiwaD par baras rahi hain jis tarah

kiwaD hi ki nabz-ashna koi hawa na ho

wo kam-suKHan sahi magar koi to aur baat hai

KHamoshiyon ki aaD mein wo dard sah raha na ho

main tum se apne dil ki wardat kah to dun magar

agar hamara rasta yahin kahin juda na ho

gale laga rahi ho to KHayal bhi rahe 'ufuq'

tumhein jo ishq lag raha hai asl mein bala na ho