ye alag baat ki peshani pe bal aaega

ye alag baat ki peshānī pe bal aa.egā

ġhaur karte raho kuchh hal bhī nikal aa.egā

biij bhī Daal de ummīd-e-samar bhī taj de

jab tirī nasl javāñ hogī to phal aa.egā

maslahat oḌh ke chup-chāp tamāshā ban jā

jo bhī aa.egā muḳhālif tire hal aa.egā

ek qānūn-e-mukāfāt-e-amal hai zālim

aaj jo kartā hai tū sāmne kal aa.egā

umr guzrī hai kabhī diid kī lazzat mil jaa.e

jaane kab merī nigāhoñ meñ vo pal aa.egā

'dānishā' bazm meñ un kī to ġhazal jhuum ke paḌh

un kī jānib se bhī kuchh radd-e-amal aa.egā

ye alag baat ki peshani pe bal aaega

ghaur karte raho kuchh hal bhi nikal aaega

bij bhi Dal de ummid-e-samar bhi taj de

jab teri nasl jawan hogi to phal aaega

maslahat oDh ke chup-chap tamasha ban ja

jo bhi aaega muKHalif tere hal aaega

ek qanun-e-mukafat-e-amal hai zalim

aaj jo karta hai tu samne kal aaega

umr guzri hai kabhi did ki lazzat mil jae

jaane kab meri nigahon mein wo pal aaega

'danisha' bazm mein un ki to ghazal jhum ke paDh

un ki jaanib se bhi kuchh radd-e-amal aaega