ye anasir se bana tan ka makan kuchh bhi nahin

ye anāsir se banā tan kā makāñ kuchh bhī nahīñ

māsivā-e-zahmat o bār-e-garāñ kuchh bhī nahīñ

us kī rahmat ke binā hai zindagī be-fā.eda

chaar din kā khel hai umr-e-ravāñ kuchh bhī nahīñ

jism kī lazzat ke pīchhe kyoñ bhaTaktā hai mudām

ruuh meñ rab ko basā le jism-o-jāñ kuchh bhī nahīñ

haiñ ġharaz ke rishte-nāte ho zarūrat to lagāv

varna bāham dostoñ ke darmiyāñ kuchh bhī nahīñ

aaj hai terī jo daulat chhoḌ bhī saktī hai saath

sīm-o-zar imlāk arāzī jāvedāñ kuchh bhī nahīñ

hai ḳhudā rozī-rasāñ jo māñgnā hai us se maañg

ho na us kā izn to miltā yahāñ kuchh bhī nahīñ

ruuh kī gahrā.iyoñ se us kī ban jā 'nāzlī'

ek tū ho aur ḳhudā ho darmiyāñ kuchh bhī nahīñ

ye anasir se bana tan ka makan kuchh bhi nahin

masiwa-e-zahmat o bar-e-garan kuchh bhi nahin

us ki rahmat ke bina hai zindagi be-faeda

chaar din ka khel hai umr-e-rawan kuchh bhi nahin

jism ki lazzat ke pichhe kyon bhaTakta hai mudam

ruh mein rab ko basa le jism-o-jaan kuchh bhi nahin

hain gharaz ke rishte-nate ho zarurat to lagaw

warna baham doston ke darmiyan kuchh bhi nahin

aaj hai teri jo daulat chhoD bhi sakti hai sath

sim-o-zar imlak araazi jawedan kuchh bhi nahin

hai KHuda rozi-rasan jo mangna hai us se mang

ho na us ka izn to milta yahan kuchh bhi nahin

ruh ki gahraiyon se us ki ban ja 'nazli'

ek tu ho aur KHuda ho darmiyan kuchh bhi nahin