یہ اپنا آپ ہے جو اس کو تو کیا جائے

یہ اپنا آپ ہے جو اس کو تو کیا جائے

تماشہ ہونے کا پھر کو بہ کو کیا جائے

کہاں ہے خاک میسر یہاں تیمم کو

تو کیوں نہ خون سے اپنے وضو کیا جائے

بنائیں بستر راحت اداسیٔ شب کو

غموں کو چادر لا تقنطو کیا جائے

جب اس کا عکس نہیں ہم تو کیا ضروری ہے

کہ جو بھی اس نے کیا ہو بہ ہو کیا جائے

اجاڑ اجاڑ ہے باغ حکایت جاناں

حنا کا ذکر برنگ لہو کیا جائے

یہ سرخ روئی تو انعام عشق ہے ثاقبؔ

یہ کوئی زخم ہے جس کو رفو کیا جائے