ye apna aap hai jo isko tu kiya jae

ye apnā aap hai jo is ko tū kiyā jaa.e

tamāsha hone kā phir kū-ba-kū kiyā jaa.e

kahāñ hai ḳhaak mayassar yahāñ tayammum ko

to kyoñ na ḳhuun se apne vuzū kiyā jaa.e

banā.eñ bistar-e-rāhat udāsī-e-shab ko

ġhamoñ ko chādar-e-lā-taqnatū kiyā jaa.e

jab us kā 'aks nahīñ ham to kyā zarūrī hai

ki jo bhī us ne kiyā hū-ba-hū kiyā jaa.e

ujaaḌ ujaaḌ hai bāġh-e-hikāyat-e-jānāñ

hinā kā zikr ba-rang-e-lahū kiyā jaa.e

ye surḳh-rūī to in’ām-e-‘ishq hai 'sāqib'

ye koī zaḳhm hai jis ko rafū kiyā jaa.e

ye apna aap hai jo is ko tu kiya jae

tamasha hone ka phir ku-ba-ku kiya jae

kahan hai KHak mayassar yahan tayammum ko

to kyon na KHun se apne wuzu kiya jae

banaen bistar-e-rahat udasi-e-shab ko

ghamon ko chadar-e-la-taqnatu kiya jae

jab us ka 'aks nahin hum to kya zaruri hai

ki jo bhi us ne kiya hu-ba-hu kiya jae

ujaD ujaD hai bagh-e-hikayat-e-jaanan

hina ka zikr ba-rang-e-lahu kiya jae

ye surKH-rui to in’am-e-‘ishq hai 'saqib'

ye koi zaKHm hai jis ko rafu kiya jae