ye arz-o-sama qulzum-o-sahra mutharrik

ye arz-o-samā qulzum-o-sahrā mut.harrik

ik tū hī nahīñ shams hai duniyā mut.harrik

tā-hadd-e-nazar ik vahī chehrā mut.harrik

yā husn-e-mujassam kā hai jalvā mut.harrik

insānoñ meñ ab bū-e-vafā hī nahīñ miltī

har shaḳhs nazar aatā hai tanhā mut.harrik

ye soch rahā huuñ use kis chiiz kā ġham hai

rahtī hai mire dil meñ tamannā mut.harrik

yuuñ dhuup se ghabrā ke maiñ saa.e meñ na baiThā

sākin hai agar peḌ to saayā mut.harrik

ḳhushbū-e-gul-e-tar pe hī mauqūf nahīñ hai

har shāḳh-e-gul-e-tar kā hai pattā mut.harrik

raushan kiye ik ne to bujhā.e diye ik ne

harakat meñ hai zulmat to ujālā mut.harrik

jis kī bhī jo manzil hai vahīñ tak ye gayā hai

raahī kī badaulat huā rastā mut.harrik

vo chāñd ho sūraj ho gul-e-tar ho ki shabnam

ham ne to har ik chiiz ko dekhā mut.harrik

dariyā kī hadoñ meñ jo utar jāoge ai shams'

ā.eñge nazar sāhil-o-dariyā mut.harrik

ye arz-o-sama qulzum-o-sahra mutharrik

ek tu hi nahin shams hai duniya mutharrik

ta-hadd-e-nazar ek wahi chehra mutharrik

ya husn-e-mujassam ka hai jalwa mutharrik

insanon mein ab bu-e-wafa hi nahin milti

har shaKHs nazar aata hai tanha mutharrik

ye soch raha hun use kis chiz ka gham hai

rahti hai mere dil mein tamanna mutharrik

yun dhup se ghabra ke main sae mein na baiTha

sakin hai agar peD to saya mutharrik

KHushbu-e-gul-e-tar pe hi mauquf nahin hai

har shaKH-e-gul-e-tar ka hai patta mutharrik

raushan kiye ek ne to bujhae diye ek ne

harakat mein hai zulmat to ujala mutharrik

jis ki bhi jo manzil hai wahin tak ye gaya hai

rahi ki badaulat hua rasta mutharrik

wo chand ho suraj ho gul-e-tar ho ki shabnam

hum ne to har ek chiz ko dekha mutharrik

dariya ki hadon mein jo utar jaoge ai shams'

aaenge nazar sahil-o-dariya mutharrik