ye aur baat hai bad-namiyon ke ghar mein raha

ye aur baat hai bad-nāmiyoñ ke ghar meñ rahā

yahī bahut hai ki maiñ aap kī nazar meñ rahā

na rāstoñ kā pata thā na manzileñ ma.alūm

safar tamām huā aur maiñ safar meñ rahā

kisī kī zulf kā saaya kahāñ nasīb huā

tamām umr sulagtī sī dopahar meñ rahā

hazāroñ qāfile manzil pe jā ke lauT aa.e

maiñ sang-e-mīl kī mānind rahguzar meñ rahā

vo jis ne rakh diye dushman ke sāmne hathiyār

amīr-e-fauj kī fihrist-e-mo'atabar meñ rahā

ḳhud apne jism kī parchhā.iyoñ meñ so jaao

ḳhizāñ kā daur hai saaya kahāñ shajar meñ rahā

qadam qadam pe lagī Thes ābgīnoñ ko

ḳhayāl-e-ḳhātir-e-ahbāb sīm-o-zar meñ rahā

ye aur baat hai bad-namiyon ke ghar mein raha

yahi bahut hai ki main aap ki nazar mein raha

na raston ka pata tha na manzilen malum

safar tamam hua aur main safar mein raha

kisi ki zulf ka saya kahan nasib hua

tamam umr sulagti si dopahar mein raha

hazaron qafile manzil pe ja ke lauT aae

main sang-e-mil ki manind rahguzar mein raha

wo jis ne rakh diye dushman ke samne hathiyar

amir-e-fauj ki fihrist-e-mo'atabar mein raha

KHud apne jism ki parchhaiyon mein so jao

KHizan ka daur hai saya kahan shajar mein raha

qadam qadam pe lagi Thes aabginon ko

KHayal-e-KHatir-e-ahbab sim-o-zar mein raha