ye aur baat hai ki sahaara nahin bane

ye aur baat hai ki sahārā nahīñ bane

lekin kisī kī raah kā kāñTā nahīñ bane

yāroñ ke ham ne aib chhupā.e haiñ bārhā

un ko bachāyā ḳhud bhī tamāsha nahīñ bane

dushvār rāstoñ kā unheñ tajraba nahīñ

manzil jo log ban ga.e rastā nahīñ bane

insān hī to ban nahīñ paa.e jo aham thā

vaise to log banñe ko kyā kyā nahīñ bane

tum se baḌī umiid lagā rakkhī thī magar

tum bhī to mere haq meñ masīhā nahīñ bane

'nusrat' vo ham se is liye nārāz haiñ ki ham

un kī bulā.ī bhiiḌ kā hissa nahīñ bane

ye aur baat hai ki sahaara nahin bane

lekin kisi ki rah ka kanTa nahin bane

yaron ke hum ne aib chhupae hain barha

un ko bachaya KHud bhi tamasha nahin bane

dushwar raston ka unhen tajraba nahin

manzil jo log ban gae rasta nahin bane

insan hi to ban nahin pae jo aham tha

waise to log banne ko kya kya nahin bane

tum se baDi umid laga rakkhi thi magar

tum bhi to mere haq mein masiha nahin bane

'nusrat' wo hum se is liye naraaz hain ki hum

un ki bulai bhiD ka hissa nahin bane