ye aur baat hamein surat-e-gulab lage

ye aur baat hameñ sūrat-e-gulāb lage

'jamīl' zaḳhm lage aur be-hisāb lage

tumhāre ba.ad na takmīl ho sakī apnī

tumhāre ba.ad adhūre tamām ḳhvāb lage

maiñ kaise tujh ko pukārūñ kahāñ se lā.ūñ tujhe

tire baġhair agar zindagī azaab lage

maiñ jitnī baar paḌhūñ kaise kaise rañg bharūñ

tirā gulāb sā chehra mujhe kitāb lage

har ik savāl pe to muskurā ke rah jaa.e

hameñ to ek hī jaisā tirā javāb lage

dikhā.ī de kabhī mahtāb meñ tirī sūrat

kabhī tū din ke ujāle meñ āftāb lage

'jamīl' ḳhvāb haqīqat-numā bhī hote haiñ

vahī qarīb-e-rag-e-jāñ hai jo sarāb lage

ye aur baat hamein surat-e-gulab lage

'jamil' zaKHm lage aur be-hisab lage

tumhaare baad na takmil ho saki apni

tumhaare baad adhure tamam KHwab lage

main kaise tujh ko pukarun kahan se laun tujhe

tere baghair agar zindagi azab lage

main jitni bar paDhun kaise kaise rang bharun

tera gulab sa chehra mujhe kitab lage

har ek sawal pe to muskura ke rah jae

hamein to ek hi jaisa tera jawab lage

dikhai de kabhi mahtab mein teri surat

kabhi tu din ke ujale mein aaftab lage

'jamil' KHwab haqiqat-numa bhi hote hain

wahi qarib-e-rag-e-jaan hai jo sarab lage